上星期六，有個男仔好冷血呀，佢應承咗陪個女仔出街食飯，點不知自己成十一點幾先喺旺角出現‧
本來個女仔因為心情唔好，所以想搵人陪佢出嚟，嗰個男仔朝早同個女仔講大約五點幾會喺葵涌收工，到咗夜晚個男仔打俾個女仔話佢喺尖沙咀，咁個女仔覺得係尖沙咀搭火車去佢屋企都唔係好遠喱，之後等到七點幾，個女仔又打俾個男仔問佢喺邊喥，點不知個男仔話佢喺旺角，吓？成個鐘頭仲喺旺角？個男仔嘅回答係因為佢搭巴士嘅關係，咁個女仔覺得予其坐喺屋企等倒不如約喺出面等啦，當個女仔去到旺角嘅時候打俾個男仔，個男仔話佢去咗深水涉，佢想自己行一陣，轉頭先打番俾個女仔，嗰時已經八點幾喇，個女仔嘅心情開始向下滑落，但係佢覺得既然約咗人食飯，自己走咗去好似唔係咁好，而且個女仔喺喥諗個男仔係咪同佢一樣有心事而唔開心呢，諗到呢到個女仔就唯有自己行啦，又到咗九點幾，個女仔再次打俾個男仔，個男仔竟然話自己喺官塘喥同人食緊嘢，天啊！個女仔仲以為自己聽錯，當時佢嘅心情好覆雜，好唔開心同埋好嬲，佢原本已經心情唔好，佢冇諗過要人嚟安慰佢，佢祗係想搵人陪吓佢喱，唔知點解嗰個人好似要再插佢一刀咁，嗰個女仔啲眼淚即時好似水喉咁刪唔到，終於喊到個人累曬嘅時候，嗰個女仔決定返屋企，就喺呢個時候，個男仔就打電話嚟問個女仔喺邊喥，唉！食飽先打電話嚟做咩呀？之後嗰個男仔約個女仔喺旺角等，嗰時已經係十一點幾啦‧
到咗第二日，嗰個女仔起身見到自己個樣嚇咗一跳，佢嗰日用熱水洗咗三次臉，做咗四次mask，沖咗兩次涼，其他嘅時間就走咗去瞓覺‧
到咗第三日，個樣終於可以見得吓人喇，就喺嗰日個男仔同個女仔講，話自己去咗尖沙咀嘅旅行社喥睇嘢，點不知行吓行吓發覺自己頭暈眼花，咁就去咗個醫生朋友喥睇病，然後就同個醫生朋友一齊去咗官塘食嘢，最後就打電話俾個女仔約佢喺旺角等喇‧
全站熱搜
留言列表
【Egoism】 (4)
{{ article.title }}
