『桂林山水甲天下』呢句說話真係明不虛傳，去到嗰度好似有種與世隔絕嘅感覺，可能因為喺繁華都市住得太耐嘅關係啦，桂林簡直係一個世外桃園嘅仙境咁‧唔知點解嗰度啲石頭好古怪，奇形怪狀咩都有，而且桂林啲山非常之高，仲高過我屋企層樓〈我屋企喺半山腰〉，我企喺山腳就好似一隻蟻咁細，哈......就係嗰種感覺，佢令到我覺得呢個世界真係好大、好大‧桂林最出名就係芋頭、桂花同埋辣椒醬，不過嗰度咩都有得食，最怕你唔食，嗰喥有啲另類食品，e.g.係食起嚟吱吱聲嘅白老鼠肉、韓國餐廳入面嘅美味燒狗肉、某啲店入面有黑螞蟻乾嘅食物......喺嗰喥朝早都係去睇吓啲山水名勝，但係原來夜晚就變成香港嘅蘭桂方同女人街，點解？因為喺嗰條街喥會有好多disco呀、酒吧呀、小食店呀......仲有好多小販喺路邊叫賣，嗰條街好多外國遊客，後嚟我哋個導遊話我哋知桂林主要係靠旅遊業發達，其實我覺得桂林啲人都應該幾有錢，喺我哋住嗰間五星級酒店嘅隔離全部都係高尚住宅區，我初時仲以為係其他酒店潻！不過桂林啲天氣變化好大呀，頭嗰兩日超凍呀，我將五日要著嘅衫一次過著曬上身，都仲未夠暖喎，嗰兩日我一落車雙手凍到硬咗，連揸相機都好似機械人咁；但係第三同第四日又好熱喎，我哋要攞住一堆衫返酒店；到咗最後嗰日天氣又凍番啦，我攞唔夠衫，啲衫放曬喺行李箱入面，唉！真係俾佢吹到‘啤’一聲‧
全站熱搜
留言列表
【Egoism】 (4)
{{ article.title }}
