前幾日去咗珠海同澳門玩，尋日先返Hong Kong喳‧快樂真係唔知到時間過得快，我哋每日都係食呀食、玩呀玩、睇嘢呀睇嘢咁，眨吓眼又要返嚟啦，嗚 ~ ~ ~
我哋今次係自由行，攞住本地圖周圍去，由城市到郊外，全程都冇問過路呀，哈哈！好叻呀！坐車嘅時候又估估吓，好刺激嫁，雖然有睇指示牌，但係實境同睇圖都會爭啲嘅， 珠海俾我嘅感覺係好靜，可能係我習慣咗Hong Kong嘈雜嘅生活啦，我哋去咗〝海鮮街〞食海鮮，嗰喥啲海鮮超平呀，不過要自己喺出面choose咗海鮮，然後再入去食店喥叫佢哋整嚟食，喺嗰喥唔洗自己講價嫁，食店會有人出嚟幫你講價‧好開心呀，我哋間房可以睇到日出嫁，我以前整日都想睇日出，可惜因為朝早起唔到身，所以呢個心願遲遲都實現唔到，今次我仲同太陽伯伯影咗張相潻，嘻嘻！每晚返酒店我哋都會浸吓溫泉、溫吓木桶浴...超舒服呀！我仲影咗溫泉浴個樣呀，你哋睇吓啦！我哋去咗珠海嘅〝農科奇觀〞喥參觀，嗰喥種嘅南瓜好大好大嫁，我從來都未見過咁大個南瓜，本來我哋打算喺嗰喥食lunch，我就可以飲吓南瓜湯嫁啦，點知嗰間restaurant唔開，唉，激死‧我喺珠海一間〝Cafe E. S. Kimo〞喥飲咗一杯香蕉莫加咖啡，好好味嫁，原來佢哋喺澳門都有分店，呵呵，我去飲咗兩次呀！澳門比起珠海就熱鬧好多啦，不過有樣嘢好冇面呀，我竟然喺〝Wynn Macau〞賭場門口俾人查ID card呀，同6年前一樣，唯一唔同就係嗰次喺同屋企人去〝Lisboa〞‧澳門好多好嘢食，例如我哋去咗〝加多利餐廳〝，〝Restaurant Hollywood〞，〝Fernando Restaurant〞同埋我頭先提過嘅〝Cafe E. S. Kimo〞，裡面啲嘢食真係好好味、好新鮮，下次一定要再去食‧我好想知澳門究竟有幾多間賭場，嘩！嗰喥啲賭場越開越多、越開越大，而且好靚，真係可以嫓美Las Vegas嫁‧我哋仲有去咗〝大賽車博物館〞隔離嘅〝葡萄酒博物館〞喥品嚐葡萄酒，嗰喥有專人介紹啲酒嘅產地來源等‧然後去咗〝Museu Das Comunicacoes〞嗰喥有得自製stamp嫁，好好玩，之後去咗〝澳門漁人碼頭〞、〝十六浦主題公園〞 ......，我哋今次去咗好多地方呀，總之就係馬不停蹄啦！
全站熱搜
留言列表
【Egoism】 (4)
{{ article.title }}
