Card sheath－✿ The Sky of Little Cute ✿

公司有個同事超冇品，佢借咗我個Mini SD card sheath去用之後仲要整爛咗又唔出聲，而且仲放番落個盒到好似原本我借俾佢嗰時咁嘅樣，可恨嘅係我當時冇立即打開個盒嚟check吓佢，如果唔係我會即場叫佢倍番俾我，我真係好熷呢啲人，人哋借嘢俾佢仲要整爛不單止，粒聲唔出咁還番俾人都做得出嘅！我覺得買張Mini SD card對搵萬幾蚊個月嘅佢嚟講唔係一個好大嘅負擔，而且個card sheath又係佢自己整爛嘅，倍番俾我係好應該不過嘅事嚟！但係我依加先同佢講佢一定唔會認，可能仲話唔係佢整嘅潻，因為今次呢件事令我更加覺得佢係個不負責任嘅人，之前佢已經無啦啦整爛我另外一個同事嘅枱頭擺設，而且佢不嬲出名係卸膊之人，但係每次都唔關我事，所以我就冇出聲，但係我覺得做男人做到咁樣真係好過份，都唔明佢老婆點解會鍾意佢嘅！

我讀書嘅時候屋企人整日都會同我講一句說話：經一事長一智！呢句話真係正確無誤‧嗰時我又係借咗套漫畫書俾個同學，佢睇完之後本書就一頁頁咁掉曬出嚟，當時好唔開心，因為套書係我特登叫朋友幫我去書展喥買嘅；而另一次就係我借咗自己偶像嘅CD俾人聽，點不知佢還番俾我之後隻碟花曬，從此我就冇借過任何嘢俾人啦，直到出嚟做嘢之後，我覺得如果其他人需要幫忙咪盡量去幫囉，可惜又係同一命運！