✿ The Sky of Little Cute ✿

「男人之虎」、「死佬日記」大家就睇得多喇，男人總係鼓吹自己如何苦，因為門票非常賣得，所以男人講完又講，一講再講自己如何被女人弄苦，但係女人之苦又有幾多個男人會明白呢？最終都係女人自己知，唔信？咁你哋有冇見過話劇有做過女人之苦呀？係咪冇呢？每個女人總係唔出聲咁忍、忍、忍、死忍，冇辦法喇，一出聲個男人就話你好罵佢呀、唔尊重佢屋企人呀、又話人哋啲女朋友；老婆邊有你咁樣架之類嘅說話你聽，唉！其實做女人好辛苦架‧好似啲男人話女人整日搶錢、洗得多錢咁，唔通冇男人騙女人錢咩？報紙都見得多喇，阿咩咩女星被老公；男朋友騙曬啲身家去，人哋都唔一定天生有錢架，而且你哋同個女人拍拖嘅時候已經知佢係啲咩人架喇，你唔想洗咁多錢未尾鬼再同佢一齊囉，另外啲男人買車呀、買電器呀唔通又會平過買女人買名牌手袋？而且我見到條街有好多男人都咩LV架喎，LV已經唔係女人專屬架啦喎！點解啲男人唔話吓自己整日唔想俾家用？如果咁唔願意俾就未鬼同個女人求婚喇，自己入墳墓又話俾個女人迫，如果唔願意個女人都迫唔到架喇，搵個七老八十嘅阿婆同你結婚呀，睇吓迫唔迫到你哋，呢喥要注明嗰個唔係富婆‧

其實每個男人肯花多啲時間去關心吓自己愛嘅人已經好足夠架喇，起碼你會知道個女人需要啲咩嘢，佢為咩事唔開心，其實兩個人一齊係相對嘅，啲男人整日要個女人單方面付出，真係好自私架‧祗要俾個女人知道你哋永遠都支持、關心佢哋，佢哋已經好開心架喇，但係我都唔明咁簡單嘅嘢都冇人做得到，我當然知道有人會話我有呀，但係睇吓喺呢個單身女人越嚟越多嘅社會就知道男人不可靠喇‧男人總係為咗錢同女人而煩惱，但女人亦都會為男人同埋點樣討好男人嘅家人而煩惱，我覺得兩者坦誠係最重要嘅，男人整日話女人八卦，同樣男人都係公開咁樣討論女人唓！

我講嘅嘢冇咩特別含意，祗係想男人們都諗吓自己講過同做過嘅嘢‧事原係尋日一個舊同事IM我，言語間我覺得佢婚後生活並唔開心〈已經唔知身第幾個女人同我講過喇〉，結婚之後嘅女人當然又係為咗男人嘅屋企人而唔開心喇，但係男人係咪應該要做啲嘢呢？佢究竟記唔記得當初結婚自己應承女人啲咩呢？我唔係叫你哋編幫老婆或阿媽，而係我覺得仲有其他方法可以做嘅，大家都係一家人，點解知道出問題都唔理呢！